De Nordkark geiht vun Sylt bit Usedom, vun Stralsund över Rostock bit hen nah Hamborg. Un överall warrd plattdüütsch schnackt. Dat Platt in Pommern höört sik anners an as dat in Meckelbörg un Sleswig-Holsteen. Un liekers verstaht wi uns all, ok wenn de een Kauh seggt und de anner Koh, un de Meckelbörger to Kirch geiht un de Holsteener to Kark. Plattdüütsch höört mit to de groote Riekdom vun uns Kark. Siet lange Johrn al sett sik de Arbeidskrinks för Plattdüütsch in de Kark (in Meckelbörg un Pommern: Plattdüütsch in de Kirch) dorför in, dat Nedderdüütsch lebennig blifft.

So kaamt wi Jahr för Jahr inne Januar in Ratzborg tohoop to`t Plattdüütsch Pastoralkolleg. Ok op de Karkendag sünd wi all twee Jahr mit dorbi. Dor arbeidt wi wunnerbar mit de Plattdüütschen in Neddersassen tosamen.

Bi de Arbeidskrinks sünd Pasters, Lektoren, Prädikanten un Ehrenamtliche mit dorbi. Jedeen, de Lust hett, ok de, de noch nienich wat op platt maakt hett, dörf dorbi ween.

Wi muchen geern Mood maken un fiern Goddesdeenste un Andachten op platt. Denn Plattdüütsch röhrt dat Hart an. Un dor will Jesu Christus ja hen mit sien Woord vun Gott sien Leevde.

Peter Schuchardt