De Nordkark liggt ganz wiet baben in Düütschland. Se reckt sik vun Sylt in’n Norden bit nah Usedom in’n Oosten un nah Hamborg in’n Süden. Överall warrd plattdüütsch schnackt, un dat is een Deel vun de Lüüd ehr Identität.

Dat gifft verscheeden Klangfarven in`t Plattdüütsche. Dat Platt in Pommern klingt anners as dat in Sleswig-Holsteen un Meckelbörg. Aver liekers köönt wi uns all verstahn, eenerlei wat wi Kauh oder Koh seggt un to Kark oder Kirch gaht. För uns is düsse Riekdom en Gaav vun Gott för uns Gemeenden.

De Arbeidskrink för Plattdüütsch in de Kark, de in Meckelbörg un Pommern "Plattdüütsch in de Kirch" nöömt warrt, sett sik dor al lang för in, dat de plattdüütsche Spraak lebennig blifft. Jahr för Jahr kaamt Lüüd to’t Plattdüütsch Pastoralkolleg in Ratzborg tosamen, un ok op de Karkendag, de all twee Jahr stattfindt, findt de Plattdüütsch Goddesdeensten un Veranstaltungen groote Toloop.

In de Arbeidskrink sünd Pasters, Lektoren, Prädikanten un Ehrenamtliche, un jeedeen, de Lust hett, kann sdor mitmaken, ok wenn he noch nienich wat op Platt maakt hett. Tosamen wöllt wi de Lüüd för Plattdüütsch anspräken un Mood maken, bi Goddesdeenste un Andachten in uns Spraak to schnacken, to beden, to singen un to predigen. Plattdüütsch geiht direktemang in`t Hart. So könnt wi Gott sien Leevde op een feine Art un Wies künni maken.

Platt is nich blot en Spraak, dat is en Weg, Minschen to verbinnnen un to begeistern. Dorüm findt jem op uns Websiet veele Aarten, Plattdüütsch to beleven: Termine för Goddesdeenste, Texte för eegen Veranstaltungen un en eenfache Möglichkeit, de Spraak eenfach mal to höörn un sülm to schnacken. 

Mit ehr Hölp wöllt wi dorto bidrägen, dat Plattdüütsch in de Nordkark wasst un leevt.

All, de bi de Plattdüütsch in de Nordkark mitmaakt, laadt jem hartli in, een Deel vun düsse lebennige Traditschoon to warrn. Wi wünscht jem veel Freud bi dat Ankieken un Mitmaaken!